MAGHUSAY TA! By Uriel Cruz Vallecera

MEGADOME SA TALISAY

CEBU (Zamboanga Journal / 15 May) DILI mahinayon ang pagtukod sa megadome project sa Mandaue City pero gihulipan kini sa Cebu International Convention Center nga pagatukoron nga mao unya ang mamahimong venue sa ASEAN Summit nga ipahigayon dinhi sa Cebu unya sa Disyembre.

Pero wala mamatay sa hingpit ang damgo bahin sa megadome. Sa pagsulat niini, may nanggawas nga taho nga may laraw sa pagtukod og megadome sa Talisay City alang sa dagkong kalihokan nga ipahigayon sa maong dakbayan.

Uyon ko sa maong plano. Kini tungod kay akong nakita nga ang Talisay City usa ka haom nga dapit nga pagatukoran sa megadome. Ang tinuod, nagkinahanglan kaayo ang Talisay niining maong matang sa proyekto.

Hinuon, dili pa gayod segurado kon mahinayon ba ang pagtukod og megadome sa Talisay. Pero gibutyag sa usa ka opisyal sa maong dakbayan nga makasugakod na ang Talisay sa mga galastohan sa pagtukod sa maong proyekto.

Mao nga angay gayod kini nga ihinayon. Kon matukod gayod ang megadome sa Talisay, mas makasamot kini sa atraksiyon sa Cebu ilabi na sa mga kalihokan nga may kalabotan sa paugnat sa kusog.

-o0o-

Nagtinguha ang mga opisyal sa Mandaue City sa paghimo sa proyektong South Special Zone diin anha ibutang ang bag-ong central business district sa nahisgotang siyudad.

Matod pa sa balita nga andam mga mobubo og milyones ang kagamhanan sa Mandaue City alang sa masterplan sa maong protekto nga usa ka international urban planner ang modumala sa pagtuon.

Dili basta-basta kining maong proyekto. Dako kinig gasto. Hinuon, nasayod ko nga masugakod kini sa panudlanan sa Mandaue City ug maayo usab ang ikadulot niining maong proyekto kon matigayon gayod kini.

Kon matigayon kining maong proyekto, seguradong daghan unya ang mga negosyante nga madani sa pagbubo og puhonan alang sa negosyo sa maong proyekto, butang nga makatabang sa pagpalambo pag-ayo sa Mandaue.

Kining maong proyekto usa ka damgo nga dako kaayog epekto sa umaabot. Dili kini proyekto nga mapahimuslan lang sa pipila ka tawo kondili sa kadaghanan. Pinaagi unya niini, mosamot ang pag-uswag sa Sugbo ug seguradong modaghan ang oportunidad sa panarbaho.