MAGHUSAY TA! By Uriel Cruz Vallecera

ORDINANSA BATOK SA PAGSABA-SABA

CEBU CITY (Uriel Vallecer / 25 May) NAKADUNGOG na ba kamo niining gitawag og anti-noise ordinance? Ordinansa kini batok sa pagsaba-saba. Nindot kining maong ordinansa kay makatabang gayod kinig dako ngadto sa mga molupyo sa Cebu City.

Giawhag ang Association of Barangay Council (ABC) ug ang Cebu City Anti-Indecency Board (CAIB) alang sa estriktong pagpatuman sa anti-noise ordinance sa mga barangay sa Cebu City.

Si Konsehal Arsenio Pacana maoy mipasar niining maong resolusyon gumikan usab sa daghang mga reklamo nga iyang nadawat gikan sa mga molupyo sa lainlaing barangay.

Sentro sa mga reklamo ang mga disko nga ipahigayon sa kabarangayan panahon nga may pista ug ang mga karaoke bars nga saba kaayo panahon sa kagabhion nga makatugaw sa pagkatulog sa mga residente.

Alang nako, mas maayo gayod nga ipatuman na kining maong ordinansa tungod kay dilio malalis nga daghan gayod kaayo ang mga karaoke bars karon nga walay kuto-kuto sa kasaba sa ilang sound system panahon sa kagabhion.

Mora bag walay respeto ang mga operator niini sa mga silingan nga natulog. Mao nga uyon kaayo ko nga ipatuman kining anti-noise ordinance aron ma-regulate ang gikusgon sa mga sound system sa mga balay-kalingawan nga magsaba-saba panahon sa kagabhion.

Akong nakita nga dili daotan ang tumong niining maong ordinansa. Dili man kini makaapekto sa negosyo niadtong mga tag-iyag karaoke bars kay dili man ipahunong ang ilang operasyon. I-regulat lang aron dili makatugaw sa mga silingan. Hinuon, kadtong dili gyod mopatuo kinahanglan gyod nga pahamtangan og disiplina aron motagam.

Hinaot usab unta nga ang pagpatuman sa maong ordinansa seryosohon sa mga tigpatuman niini. Nindot kaayong hunahunaon kon ikapatuman na kini sa hingpit kay segurado man gayod nga ikahinangop kini sa daghang mga residente.

Aduna ra bay mga karaoke bars nga naduol sa mga ospital dinhi sa dakbayan sa Sugbo. Kini sila ang usa sa angay pahamtangan niining maong ordinansa sa anti-noise.

Dalaygon usab kaayo si Konsehal Pacana nga maoy nakahunahuna niining maong ideya. Hinaot unta nga makahunahuna pa siyag dugang maayong mga ideya nga kapahimuslan sa mga Sugboanon.

-o0o-

Dakong dungog sa Cebu nga anhi gayod ipahigayon ang 12th ASEAN Summit. Mao nga angay gayod kining pangandaman og maayo sa mga opisyal sa Sugbo aron presentable sab ang lalawigan alang sa mga bisita.

Ganahan kong mosuporta sa mga ideya ni Cebu City Mayor Tomas Osmena kaabot sa pagpangandam sa ASEAN Summit. Ang iyang mga ideya nga giisnab sa uban nindot kaayo ug seguradong makadugang kini sa atraksiyon sa Sugbo sa natad sa tuismo.

Daghan man god og mga ideya si Osmena nga makapalig-on sa turismo sa Sugbo sama sa pagpahigayon og festival sa kabarangayan sa bukiran nga bahin sa dakbayan sa Sugbo aron nga madani gayod ng mga bisita.

Angay tingai nga suportahan ug sun-on sa mga opisyal sa ubang mga dakbayan ug kalungsoran sa Sugbo ang ideya ni Osmena. Ang pagahigayon sa ASEAN Summit magbutang sa Sugbo sa panid sa kasaysayan sa turismo sa mas taas nga level kon makahunahuna lang og maayo ang mga opisyal. (Columnist Uriel Vallecera is based in Cebu province)