MAGHUSAY TA! By Uriel Cruz Vallecera

BAG-ONG NGALAN

SA pagsulat niining lindog, taudtaod nang nakahukom si Cebu City Mayor Tomas Osmena nga ilisan og bag-ong opisyal nga ngalan ang multi-billion nga South Reclamation Project (SRP).

Nakahukon si Mayor Osmena nga pormal nang iparehistro sa buhatan sa Department of Trade and Industry (DTI) ang South Road Properties isip bag-ong opisyal nga ngalan sa SRP.

Kalabot niini, gipahibawo na ni Osmena si Konsehal Edgardo Labella kalabot niining maong plano aron si Labella na ang mopahigayon sa pagpasar og resolution alang niining maong katuyoan.

Matod pa ni City Administrator Francisco Fernandez nga gituyo nila nga iparehistro na ang ngalan nga South Road Properties aron makabaton na gayod og opisyal nga ngalan ang SRP.

Gituohan nga pinaagi sa paghatag og opisyal nga ngalan sa SRP madasig usab ang mga magpapatigayon sa pagbubo sa ilang puhonan alang sa pamatigayon sa maong proyekto.

Kining bag-ong ngalan haom gihapon sa maaong proyekto ug wala makawagtang sa iyang imahe isip SRP. Busa nagtuo ko nga walay negatibong epekto ang maong ngalan alang sa nahisgotang proyekto.

-o0o-

Dunay pipila nga misupak sa ideya ni Cebu City Mayor Tomas Osmena nga hatagan og armalite ang mga barangay kapitan sa bukirang kabarangayan sa dakbayan sa Sugbo.

Nindot baya unta kining maong ideya Osmena. Gumikan sa pagdagsang karon sa mga badlongon sa katilingban, angay nga hatagan og eksaktong panalipod sa ilang kaugalingon ang mga barangay kapitan.

Apan ang mas batakan nga panginahanglan, gawas sa armas, angay usab hatagan og dakong pagtagad ni Mayor Osmena. Dunay mas mahinungdanong panginahanglan ang katawhan sa dakbayan sa Sugbo nga mas lehitimo kay sa pag-armas sa mga kapitan.

Hinuon, kon abunda gayod kaayo ang panudlanan sa dakbayan sa Sugbo, okey kaayo kining maong ideya sa pag-armas sa mga kapitan. Kana lagi kon may ikapalit silag armas nga dili maapektohan ang batakang panginahanglan sa Sugbo nga nagkinahanglan og budget. (Columnist Uriel Vallecera is based in Cebu province)