MAGHUSAY TA! By Uriel Cruz Vallecera

BOC-CEBU MIDONAR

ANG Bureau of Customs-Port of Cebu uban sa mga brokers ug mga negosyante midonar og P450 mil ngadto sa Gawad Kalinga nga usa ka non-government organization (NGO) nga nanukod og mga balay ngadto sa kabos sa atong katilingban.

Si Cebu Customs District Collector Ma. Lourdes Mangaoang mao gayod ang nangunay sa pagpangulo sa pagtunol sa tseke ngadto sa Gawad Kalinga nga gipangulohan ni Vicc Abarquez, ang provincial area director sa nahisgotang kahugpongan.

Matod pa ni Abarquez nga ang pundo nga gidonar sa BOC-Cebu makahimo na og labing menos walo ngadto sa napulo ka balay. Gibanabana usab nga ang matag balay magkantidad og P60 mil.

Dalaygon kining gibuhat sa BOC-Cebu. Sa tinuod lang, haom sa panahon ang ilang gihimong pagdonar og pundo tungod kay ang hubo natong mga mata nakasaksi man gayod sa makaluluoyng kahimtang sa atong kaigsuonan nga walay balay nga kapahulayan o kapalabyan sa kagabhion.

Ang walo ngadto sa napulo ka balay nga matukod sa maong pundo dako na kaayomng tabang alang sa mga less fortunate natong kaigsuonan. Kon magsinardinas man pagpuyo, mokabat na sa bayente ka pamilya ang makapahimulos niining maong proyekto. Mao nga...salamat sa BOC-Cebu ug kang Collector Mangaoang gayod mismo.

-o0o-

Dunay sugyot ang ordinaryong mga lungsoranon nga angay ipa-drug test ang mga porter ug traysikad driver diha sa mga dunggoanan sa Cebu City tungod kay ang kadaghanan kanila adunay bisyo sa pagsuyoip og rugby ug paghingos sa shabu.

Ang ubang mga traysikad driver ug porter diha mounay sa pag-ilad sa mga pasahero sa barko. Bakikaw kaayong pamation nga imbes motabang sila sa mga pasahero, sila na man hinuon ang naghatag kanilag puwerhisyo.

Mao nga uyon ko sa sugyot nga ipa-drug test kanang mga porter ug traysikad driver sa pier. Ang mamatud-an nga positibo kinahanglan nga pahamtangan og tukmang disiplina aron dili maangin sa ilang kabuang ang uban nga nagtinarong sa trabaho. (Columnist Uriel Vallecera is based in Cebu province)