Monday, June 26, 2006

MAGHUSAY TA! By Uriel Cruz Vallecera

PAKIGBATOK SA CYBER SEX SA CEBU

SAGOPON ug ipatuman ni Cebu City Mayor Tomas Osmena ang calibrated preemptive response (CPR) dinhi sa dakbayan sa Sugbo. Kini ang nahunahunaan sa mayor aron pakigbatokan ang nagkagrabe na gyod nga suliran sa mikatap nga cybersex diha sa mga internet cafe.

Apan ang sentro sa kampanya karon ni Mayor Osmena mao ang pag-ban sa mga menor-de-edad nga makasulod sa mga internet cafe aron makalikay sila salaw-ay nga buhat.

Aron gayod maseguro nga mokooperar ang mga tag-iya ug tagdumala sa mga internet cafe, i-revoke sa mayorang mga businesspermit ug pasirad-an ang internet cafe nga magpasulod og menor-de-edad.

Dili ko mosupak niining maong lakang kon ipatuman man gayod kini kon ang tumong mao ang paglikay sa kabataan gikan sa makadaot nga impluwensiya diha sa internet.

Pero maayo tingaling tun-an unag maayo kon unsay mamahimong resulta kon ihinayon gayod ang pagsagop ug pagpatuman niini kay tingalig adunay tiil sa atong kaigsuonan nga atong matumban tungod niini.

Nakasulti kog ingon niini tungod kay segurado man gayod nga maapektohan niini ang negosyo sa mga tag-iyag internet cafe. Seguradong makunhoran ang ilang kita tungod kay daghan ra ba kaayo ang mga bata nga suki na sa mga internet cafe.

Ang labing maayo tingaling buhaton mao ang pagsusi sa mga internet cafe kon wala ba silay private rooms. Dili na tingali kinahanglang did-an pa ang mga menor-de-edad pagsulod og internet cafe kon maseguro lang nga walay private rooms ang internet cafe nga ilang masudlan.

Kuwang kog pagtuo nga madasig lang gihapon ang mga menor-de-edad sa pag-perform og cybersex kon anha sa daghang mga kustomer sa internet tungod kay makauuwaw man gayod kiining maong buhat.

-o0o-

Nagpagawas og kapin sa P2 million nga gahin ang lokal nga kagamhanan sa Cebu City alang sa computerization sa blotter system sa Cebu City Police Office (CCPO). Gitinguhang mapatuman na kining computerization system sapolice blotter sa CCPO sa dili pa ang ASEAN Summit nga ipahigayon sa umaabot nga Disyembre.

Si Konsehal Jun Pe sa dakbayan sa Sugbo maoy nakahunahuna sa computerization blotter system sa tuyo nga mahimong masepektibo ang kapolisan sailang trabaho.

Nindot baya kining maong laraw. Pero wala kini makapakombinser nako nga ang maong sistema makapausab sa mentalidad sa tapolan nga mga polis. Hinuon, sa usa ka paagi o sa lain, makatabang gayod kini aron mahimong epektibo sa pagpangalagad ang kapolisan.

Pero dili kita makapaabot nga makatampo kinig dako sa mas malungtaron, mas dali ug mas epektibong pangalagad gikan sa atong kapolisan. Bentaha na lang gayod hinuon kon computerized na ang blotter sa kapolisan.(Columnist Uriel Vallecera is based in Cebu province)

No comments: