MAGHUSAY TA! By Uriel Cruz Vallecera

MAAYO HINUON

TUGOTING sublion nako sa pagpadayag ang akong kahinangop sa gihugonhugon nga paghimog lakang aron makabaton na og kaugalingong supply sa kuryente ang dakbayan sa Sugbo. Maayo hinuon aron kon sa usa ka paagi o sa lain, maibanan ang dakong panginahanglan sa mga Sugboanon og kuryente.

Sa pagsulat niini, gipaabot nga makapahimulos og mga modernong kahimanan ug pasilidad nga mas barato usab ang bayranan sa makonsumo nga kuryente ang tanang mga magpapatigayon nga mobubo og puhonan sa South Reclamation Project (SRP) sa Cebu City.

Gikataho nga pormal nang gipahibalo ni Mayor Tomas Osmena ang mag-produce og kaugalingong supply sa kuryente sa Cebu City. Kon walay modangat nga kakulian, posibleng magsugod sa bulan sa Septiyembre ang paggamit sa kaugalingong supply sa kuryente ug kini gamiton sa pamatigayon sa SRP.

Nunot niini, gipadayag ni Osmena nga usa ka European scientist ang gikuha nila aron maoy modugtong sa kable nga gamiton sa pagkuha og supply sa kuryente nga gproduce gikan sa biogas.

Gipaabot usab nga makahatag kini og supply sa kuryente nga 5 megawatts alang sa SRP ug kini dako na kaayong tabang alang sa mga magpapatigayon nga mobubo og puhonan sa maong proyekto sanglit makagarantiya man kini nga dili mapiang ang ilang patigayon sa panahon nga mahitabo ang lapad ug dugay nga brownout.

Ang 5 megawatts nga kuryente dako na kaayog ikatabang sa operasyon sa pamatigayon sa SRP. Nindot gayod bitaw kon adunay kaugalingong supply sa kuryente ang SRP aron nga magpadayon ang hapsay nga pamatigayon bisan pa kon may mahitabong pag-brownout. Mao nga manghinaot kita nga matigayon gayod kining maong plano.

-o0o-

Pipila na lang ka bulan ug ASEAN Summit na gyod. Gipadayon gihapon hangtod karon ang pagpangandam sa Sugbo alang sa umaabot nga 12th ASEAN Summit. Daghan na ang gihimo sa lokal nga kagamhanang lokal agig pagpangandam sa maong dakong hitabo.

Nasuta nga ang pagpahigayon sa ASEAN Summit dako kaayog matabang aron mapatahom ang Sugbo. Gipangtapakan ang libaongon nga kadalanan ug gipatahom ang mga dapit nga maagian sa mga delegado sa summit. Labaw sa tanan, gitukod ang Cebu International Convention Center (CICC) nga human sa summit, seguradong magamit pa sa laing dagkong kalihokan sa umaabot.

Angay lang nga pangandaman gayod og maayo ang pag-host sa Cebu sa ASEAN tungod kay ang pagduaw sa mga bisita nga mga delegado sa Summit posible man nga maoy maggahas og dalan aron madugangan ang mga turista nga makabig sa pagduaw sa Sugbo.

Importante gayod nga pangandaman, labaw sa tanan, ang bahin sa seguridad. Ilabi na karong panahona nga gikataho nga ang Sugbo gitarget sa mga terorista, kinahanglan gayod nga maseguro nga luwas ang mga bisita nga moduaw sa Sugbo.

Alang nako, ang Sugbo dili hingpit nga luwas gikan sa mga terorista. Daghan kaayog mga lutsanan ang mga terorista nga buot moanhi sa Sugbo. Maarang-arang na lang nga duna nay gipakatap nga mga polis sa lainlaing dapit kay sa ingon, posibleng moiklam og diyotay ang mga terorista.

Mas angay pa gayod unyang hugtan ang pagbantay sa seguridad atol sa ASEAN Summit. Delikado kon pahimuslan sab sa mga terorista ang hiagyon ug mabulabog na hinuon kita sa ilang pagpangatake atol sa maong higayon. Kinahanglang alerto kita kanunay.

-o0o-

NIADTONG miaging pipila ka semana, nabaniog ang balita nga may mga sparrow unit sa New People's Army (NPA) nga bag-o pang nakahuman sa ilang pagbansaybansay nga anaa na sa ilang test mission sa pagkakaron.

Ang misyon niining maong sparrow unit, matod pa, mao ang paglikidar sa mga kurakot nga mga opisyal sa gobyerno ug ang kapolisan. Ang kapolisan nga mibutyag niining maong kasayoran miingon nga higpit na nilang gi-build-up ang ilang intelligence network sa kabarangayan aron pag-monitor sa kalihokan niining maong mga sparrow unit.

Ang akong baroganan niining maong balita mao nga makalibog pa kini sa pagkakaron. Alang nako, dili dayon ko motuo sa maong balita tungod kay daghan karon ang mga binuang nga estorya nga gipakatap ilabi na nga hapit na ang ASEAN Summit.

Dunay akong nadunggan nga kuwarta gihapon ang nagpaluyo niining maong isyu tungod kay dunay gustong manguwarta ginamit kining maong isyu. Hinuon, dili usab gayod angay mokompiyansa ang atong kapolisan kay basin tinuod usab nga may sparrow unit gayod nga gipalihok ang mga NPA.

Hinuon, ang angay mahadlok sa giingong mga sparrow unit mao kadtong mga tawong kurakot tungod kay mao man kaha kini ang target sa maong mga elemento. Kadtong walay gibuhat nga daotan dili angay mabalaka niini.

-o0o-

Husto ang lakang sa pagpakatap og tourist police ug traffic police sa Cebu City ilabi na karon nga giingong may mga terorista nga gustong magmugnag kadaot ug kasamok sa maong lugar.

Importante kaayo nga maseguro nga luwas ang atong kaigsuonan bisan asa sila maglakaw. Angay usab proteksiyonan ang buotan natong mga turista aron dili sila motagam sa pagbisita sa Sugbo.

Hapit na ang ASEAN Summit. Ug samtang nagsingabot na ang maong dakong kalihokan nga anhi ipahigayon sa Sugbo, daghan usab ang nabalaka nga tingalig lawgawon sa mga badlongon sa katilingban ang maong kalihokan aron paghatag og buling sa Sugbo sa kalibotanong mapa.

Mao nga nalipay kaayo ko nga makakita na kitag daghang traffic police ug tourist police kay pinaagi niini, sa usa ka paagi o sa lain, mabatyagan nato nga safe kita sa usa ka lugar nga sama sa Sugbo.(Columnist Uriel Vallecera is based in Cebu province)