CAGAYAN DE ORO CITY (Mindanao Examiner / 23 Peb) – Patay ang isang 26-anyos na misis matapos itong burdahan ng saksak sa katawan ng hiniwalayang mister ng ito’y tumangging bumalik sa kandungan ng lalaking minsang minahal.
Ayon sa pulisya ay naganap ang krimen sa Barangay Agusan sa Cagayan de Oro City kamakailan. Sa tindi ng kanyang tinamong saksak ay hindi na umabot pang buhay sa ospital ang biktimang si Mary Jean Nacua.
Tadtad ng saksak ang buong katawan ng babae na ayon sa pulisya ay kagagawan ng dating asawang si Vicente. Pauwi na noon sa kanyang bahay si Mary Jean ng bigla itong harangin sa daan ni Vicente at nagmakawang bumalik sa kanyang kandungan, ngunit ito’y mariing tinanggihan ni misis.
Nagalit umano si Vicente at bumunot ng patalim at saka inundyan ng saksak ang babae. Mabilis naman itong tumakas ng makitang lugmok na ang babae at halos maligo na sa sariling dugo.
Nabatid sa mga kaanak ng biktima na hiniwalayan ni Mary Jean ang asawa dahil sa matinding pagseselos nito sa lahat ng bagay. Kasalukuyang pinaghahanap pa rin ang suspek, ayon sa pulisya. (Romy Bwaga)
No comments:
Post a Comment