PAGADIAN CITY, Pilipinas - Moretiro na sa iyang katungdanan pagka-Commanding General sa 1st Infantry (Tabak) Division, Philippine Army si Major General Nehemias Pajarito karong Pebrero 24 ning tuiga.
Kini ang iyang gibutyag sa mga tigbalita atol sa fellowship nga gipahigayon ning nakalabay nga Sabado sa buntag (Pebrero 27) sa Club House, Camp Major Cesar Sang-an, Pulalacan, Labangan ning lalawigan.
"Moretiro ako karong Pebrero 24 atol sa akong adlaw nga natawhan ug dungan sa pagahimoon nga Turnover of Command," mahinamong pahayag ni Pajarito.
"Sa akong pag-retiro akong ihatag ang akong panahon sa akong pamilya," dugang pa ni Pajarito.
Dihang gipangutana kon sa iyang pag-retiro naglaum ba siya nga ang Malakanyang magtanyag kaniya ug katungdanan sa gobyerno? Matud pa niya nga wala siya naglaum, sanglit wala siya'y plano nga mosulod ug trabaho sa gobyerno sulod sa tulo ka tuig tungod kay iya kini nga hingpit nga iguguol sa iyang pamilya.
Gipahayag ni Pajarito nga ang 1st Infantry (TABAK) Division, usa ka halandumon nga dapit alang kaniya tungod kay sa nasangpit nga Division dinhi siya nagsugod sa iyang ranggo pagka opisyal nga 2nd Lt., ug mibalik siya nga Kapitan, ug sa sunod niya nga pagbalik usa siya ka Major, dinhi siya na-promote pagka-Lt. Col., ug sa sunod niyang pagbalik niadtong tuig 2001 full-pledged Colonel, na-promote siya pagka-Chief of Staff sa Division, sa tuig 2003 nahimo siya nga Kumander sa 101 Brigade, nabalhin siya sa Piñan, Zamboanga del Norte ug nabalhin usab siya sa Jolo diin sa 104th Brigade siya sa maong lalawigan na-promote pagka-Brigadier General.
Kahindumuman nga ang 1st infantry division mao ang nag-una nga Infantry Unit sa Philippine Army nga naglangkub sa upat ka mga Brigade Units ug napulo ka mga Battalion Units nga nahimutang sa Habagatang Mindanao.
Dugang pa niya nga aduna nay mga ngalan ang pagapilian kon kinsa ang mohulip sa iyang pagabiyaan nga posisyon apan wala pay official nga pagpadayag niini.
Dugang pa ni Pajarito nga sa dugay nga mga katuigan nga pagserbisyo sa Division, gikinahanglan nga iyang pasalamatan ang mga tawo nga nakatampo ug dako sa kalampusan sa ilang misyon pagpatunhay sa kahusay ug kalinaw sa rehiyon IX. Partikular na nga iyang gipasalamatan si Gobernador Aurora E. Cerilles, Kongresista Victor Yu (Unang Distrito) ug Antonio H. Cerilles (Ikaduhang distrito), mga Municipal Mayors, mga ginsakpan sa Media, Civilians, ug uban pa.
Ang maong fellowship gipahaum sa usa yano nga paniudto nga gitawag ug "boodle fight" kon habal-habal ng gisalmutan sa mga Brigade Commanders, media, ug mga higala.
No comments:
Post a Comment