CEBU,Philippines (Mindanao Examiner / May 29, 2011) - Mokabat sa 451 ka mga pinuy-anan sa Negros Oriental ang makabenipisyo sa bag-ong program sa Department of Energy(DOE) nga gitawag ug Solar Homes Program.
Kining maong mga pinuy-anan nahimutang sa 16 ka mga sitio sa mga lungsod sa Pamplona, Siaton, Santa Catalina ug siyudad sa Tanjay.
Matag usa sa mga naila nga mga solar homes makadawat ug usa ka solar panel, upat ka LED lights ug laing usa ka built-in Am-FM nga radio, kini matud sa usa ka reporter gikan sa Visayan Daily Star.
Matod pa, matag usa ka solar panel adunay load capacity nga 30 watts – mamahimong gamiton sa pagpasiga ug suga apan dili sa pagpaandar ug mga appliances.
Ang mga LED lamps usab nga maghatag ug mas kusog nga siga samtang ubos ang magamit nga kuryente maoy girekomendar nga gamiton sa mga solar homes alang sa pagdaginot ug enerhiya.
Ang mga solar panels gituohang ipang-apod-apod sa ikatulong kwarter karong tuiga human makompleto ang tanang gikinahanglang requirement sa programa.
Matag usa ka solar panel nagkantidad ug P23,000 apan ihatag ug libre ngadto sa mga Solar Home beneficiaries nga nagpuyo sa mga lagyong dapit sa Negros kung diin dili kini maabot sa elektrisidad.
Adunay mga representante sa DOE ang makighinabi kang gobernador Roel Degamo alang sa panagsabot-sabot kabahin sa programa ug sa panahon nga mamahimong ipang-apod-apod ang mga materyales.
Matag usa sa mga solar panel itaod sa DOE technical team sa atop sa matag pinuy-anan aron aduna kini direkta nga exposure sa adlaw.
Magpahigayon usab ug mubong pagbansay-bansay ang DOE ngadto sa mga benepisyaryo aron sila makat-on sa paggamit ug pagmintinar sa mga solar panels.(Maryknoll B. Lague)
No comments:
Post a Comment