Syudad desidido sa pagpatuman sang ordinansa kontra sa pagpanigarilyo

ROXAS CITY, Philippines (Mindanao Examiner / May 29, 2011) - Desidido ang matag-as nga mga pinuno sang Syudad sang Roxas nga ipatuman ang ordinansa sang Syudad nga nagadumili sa pagpanigarilyo sa pampubliko nga mga talatapan kag lugar lakip na sa pampubliko nga mga salakyan.

Suno sa kay City Legal Officer Attorney Joseph Ador Ramos nga pinaagi sa ila gintukod nga Smoke-Free Task Force nga amo ang nagapatuman sang ila masangkaron nga kampanya, labi nga maproteksyonan ang kabuhi indi lang sang nagapanigarilyo kondi lakip man ang nagahaklo sang aso gikan sa mga nagasigarilyo.

Suno pa sa kay Ramos nga wala sapayan nga may kinamatarong ang isa ka persona sa pagpanigarilyo, may kinamatarong man ang Syudad sa paghatag proteksyon sa inosente nga mga persona ilabi na para sa ikaayong lawas, rason nga hugot nila nga ginapatuman ang amo nga ordinansa diri.

Base sa rekord sang City Health Office, kapin na sa 74 ka mga persona ang nagkaladakpan bangud sa pagpanigarilyo sapampubliko nga mga lugar sumugod sang implementasyon sini sang Abril 25 tubtob Mayo 25.

Nagalaum naman ang Syudad sang kooperasyon sang mga pumuluyo pinaagi sa pagsunod sa amo nga ordinansa agud mapaiway ang ano man nga mga penalidad angut sa paglapas diri.

Ginpasalamatan naman ni Vice Mayor Ronnie Dadivas ang mga katapu sang media, mga kapulisan, opsiales sang City Health Office lakip na ang mga kaupod niya nga mga opisyales sa Syudad sa pagpanikasog agud mahatagan katumanan ang amo nga laye diri. (Jemin B. Guillermo, PIA)