MAGHUSAY TA! By Uriel Cruz Vallecera

MODERNONG KAHIMANAN

GIPAABOT nga makapahimulos og mga modernong kahimanan ug pasilidad nga mas barato usab ang bayranan sa makonsumo nga kuryente ang tanang mga magpapatigayon nga mobubo og puhonan sa South Reclamation Project (SRP) sa Cebu City.

Sa pagsulat niining lindog, gikataho nga pormal nang gipahibalo ni Mayor Tomas Osmena ang mag-produce og kaugalingong supply sa kuryente sa Cebu City nga posibleng magsugod sa bulan sa Septiyembre ug kini gamiton sa pamatigayon sa SRP.

Matod ni Osmena nga usa ka European scientist ang gikuha nila aron maoy modugtong sa kable nga gamiton sa pagkuha og supply sa kuryente nga gproduce gikan sa biogas.

Gipaabot usab nga makahatag kini og supply sa kuryente nga 5 megawatts alang sa SRP ug kini dako na kaayong tabang alang sa mga magpapatigayon nga mobubo og puhonan sa maong proyekto sanglit makagarantiya man kini nga dili mapiang ang ilang patigayon sa panahon nga mahitabo ang lapad ug dugay nga brownout.

Naleksiyon gayod og maayo ang mga opisyal sa nahitabong linog didto sa Leyte sa miaging bulan nga maoy gitumbok nga hinungdan sa lapad nga blackout nga miigo sa tibuok Central Visayas. Ang maong hitabo nakapahigmata kanato nga kinahanglan gayod diay nga dili kita magsalig sa kuryenta nga atong makuha gikan sa laing dapit kondili kinahanglan nga aduna gayod kitay kaugalingong supply.

Nindot gayod bitaw kon adunay kaugalingong supply sa kuryente ang SRP aron nga magpadayon ang hapsay nga pamatigayon bisan pa kon may mahitabong pag-brownout. Mao nga manghinaot kita nga matigayon gayod kining maong plano.

-oOo-

Nagpadayon na karon ang pagpangandam sa Sugbo alang sa umaabot nga 12th ASEAN Summit. Daghan na ang gihimo sa lokal nga kagamhanang lokal agig pagpangandam sa maong dakong hitabo.

Angay lang nga pangandaman gayod og maayo ang pag-host sa Cebu sa ASEAN tungod kay ang pagduaw sa mga bisita nga mga delegado sa Summit posible man nga maoy maggahas og dalan aron madugangan ang mga turista nga makabig sa pagduaw sa Sugbo.

Importante gayod nga pangandaman, labaw sa tanan, ang bahin sa seguridad. Ilabi na karong panahona nga gikataho nga ang Sugbo gitarget sa mga terorista, kinahanglan gayod nga maseguro nga luwas ang mga bisita nga moduaw sa Sugbo.

Alang nako, ang Sugbo dili hingpit nga luwas gikan sa mga terorista. Daghan kaayog mga lutsanan ang mga terorista nga buot moanhi sa Sugbo. Maarang-arang na lang nga duna nay gipakatap nga mga polis sa lainlaing dapit kay sa ingon, posibleng moiklam og diyotay ang mga terorista.

Mas angay pa gayod unyang hugtan ang pagbantay sa seguridad atol sa ASEAN Summit. Delikado kon pahimuslan sab sa mga terorista ang hiagyon ug mabulabog na hinuon kita sa ilang pagpangatake atol sa maong higayon. Kinahanglang alerto kita kanunay.(Uriel Vallecera is based in Cebu province)