ANDAM na ba ang Cebu alang sa mass transit system ug ang mga PUJ paboyaheon na lang sa mga dapit nga lisod sudlon sa mas dagko nga mga bus nga maoy mohakot sa mga pasahero?
Mao kini ang usa sa labing init nga hilisgotan sa Sugbo niadtong nangaging pipila ka adlaw sa dihang gituki ang pagpangitag kasulbaran sa kahuot na sa trapiko sa dakbayan sa Sugbo.
Daghan kaayo ang miuyon sa mass transit system tungod kay gawas nga mas maayong pagkalingkod sa mga pasahero, makapakunhod usab kini sa kahuot sa trapiko sanglit ang mga pasahero nga masulod sa tulo ngadto sa upat ka jeepneys masulod man kini sa usa lang ka bus.
Pero mikisikisi ang mga PUJ driver ilabi na kadtong direktang maapektohan sa biyahe o rota unya sa mga bus nga magdagan. Makulban kuno sila sa kaldero. Kini ang unod sa ilang kabalaka.
Sa pagsulat niini, giduso nag balik ni Cebu City Mayor Tomas Osmena ang plano nga mass transit system sa mga sakyanang pasaheroan nga maggikan sa gawas sa nahisgotang siyudad nga molahos sa pagpamasahero sa nahisgotang dakbayan.
Haom kaaro ang mass transport system sa Sugbo tungod kay aduna may dagkong kadalanan nga mahimong maoy subayan sa biyahe sa maong mga public utility vehicles. Ako mismo nagtuo usab nga makapakunhod gayod kini sa kahuot sa trapiko.
Dili hinuon makataronganon nga kulban sa kaldero ang mga PUJ driver. Apan wala man sab sila did-i sa pagpamasahero sa laing rota. Gani, gipasabot man nga mas gikinahanglan ang serbisyo sa mga PUJ kon may mga bus na unya nga magdagan sa kadalanan sa Sugbo.
Ang mga PUJ maoy maghatod sa mga pasahero ngadto sa dapit nga naghulat kanila ang bus nga ilang sakyan. Mao nga dili angay mabalaka ang mga PUJ drivers nga makulban sila sa kaldero.
-o0o-
Nunot niining laraw sa pagpatuman sa mass transport system sa Sugbo, gihunghusgan ni Mayor Osmena ang pagpanakop sa mga PUJ nga nagrota og Mandaue-Jones nga molahos sa pagpamasahero sa uptown area ug ingon man sa Colon subay sa ordinansa nga gipatuman sa CITOM.
Daghan ang nagbagulbol niini tungod kay daghang mga commuters ang naapektohan. Napuwerhisyo sila kay imbes usa lang ka sakay paingon sa ilang gitrabahoan, kaduha na man hinuon sila mosakay tungod kay dili na man makasulod sa kinapusoran sa Cebu City ang mga PUJ nga naggikan sa Mandaue.
Maayo tingali nga hinuktokan kining bahina. Puwerhisyo tinuod. Didto sa Manila, ang mga PUJ nga maggikan sa Caloocan City wala did-i sa pagsulod sa Pasay City hinungdan nga dili hasol sa mga pasahero.
Hinuon, lahi ang sitwasyon sa Manila kay sa Sugbo. Pero kinahanglan gyod unta nga hatagan og convenience ang mga pasahero, dili kay puwerhisyo ang atong idulot ngadto kanila.(Columnist Uriel Vallecera is based in Cebu province)
No comments:
Post a Comment