MAGHUSAY TA! By Uriel Cruz Vallecera In Cebu

GAMAYNG PABAWON

SA akong paghikay niining lindog, gikataho nga makadawat og disturbance fee nga tag P5,000 matag usa ang dul-an sa 40 ka pamilya nga nanimuyo sa daplin sa Kinalumsan River sa Mambaling, Cebu City nga apektado sa gipatuman nga demolisyon sa kagamhanan sa siyudad.

Si Cebu City Councilor Gerardo Carillo mao ang mirekomendar niining maong lakang ngadto ni Mayor Tomas Osmena. Sa akong paghikay niining lindog, wala pa hinuon makompirmar kon misanong na ba ang mayor niining maong rekomendasyon.

Pero alang nako, maayo unta kon matigayon gayod ang pagpatuman niini. Ang tag P5,000 maingon ta nga gamay ra nga pabawon pero dako na kaayog ikatabang alang sa mga kabos natong kaigsuonan sa ilang pagbalhin sa laing dapit nga maoy ilang tukoran sa bag-o nilang mga pinuy-anan.

Nasayod ko nga ang maong kantidad dili paigo alang sa ilang panginahanglanon sa pagtukod sa ilang bag-ong balay. Pero maayo na lang kini kay sa wala. Mao nga kon mosanong man si Mayor Osmena niining maong rekomendasyon, labing maayo hinuon.

-o0o-

Dunay daghang wala matagbaw sa sistema sa pagpangolektag basura sa MandaueCity. Samtang daghan na ang mga sudlanan nga kapundohan sa mga basura, ang problema mao ang sistema sa pagpangolekta niini.

Gi-segregate na unta sa mga molupyo sa Mandaue ang ilang mga basura pero morag wala kiniy kapuslanan tungod kay maipon ra man usab ang tanan kon hakoton na kini sa garbage truck.

Maayo tingali nga i-improve og diyotay sa mga kolektor sa basura diha sa Mandaue ang ilang sistema aron mas epektibo ang ilang pagpangolekta sa mga basura.

-o0o-

Labihang daghana sa mga dispatser diha sa may highway Mandaue. Nagtuo ko nga gihasolan gayod ang mga driver sa PUJ nianang maong mga tawo. Maayo unta kon masumpo kanang mga tawhana.

Pero kinsa man usab kaha ang mosumpo kanila? Wala man gani masumpo ang mga dispatser sa CebuCity nga aduna na gyoy anti-dispatching ordinance ang Sugbo, ang Mandaue pa kaha?

Mao kini ang nakaporke. Nagtuo kong lisod kaayong badlongon kanang mga dispatser diha sa highway Mandaue. Ug hangtod dili sila masumpo, magpabilin ug magpadayon silang maghatag og labad sa ulo sa mga PUJ driver.