MAGHUSAY TA! By Uriel Cruz Vallecera In Cebu

HATAGAN OG TRABAHO

HATAGAN og trabaho sa kagamhanan sa Cebu City ang mga binilanggo sa Bagong Buhay Rehabilitation Center (BBRC) diha sa South Reclamation Project (SRP).

Sa pagsulat niining lindog, gikataho nga pormal nang gipahibalo ni Mayor Tomas Osmena ang iyang plano nga hatagan niya og kahigayonan nga makatrabaho ang maong mga piniriso samtang nagserbisyo kini sa ilang mga silot bugti sa kasal-anan nga ilang nahimo sa balaod.

Giklaro hinuon ni Mayor Osmena nga ang patrabahoon mao lamang kadtong mga binilanggo nga hapit na nakagawas o duna na lay nahibilin nga pipila ka adlaw o bulan sa ilang sentensiya.

Gihugonhugon nga usa ka gatos ka pesos (P100.00) ang suhol matag adlaw sa patrabahoon nga mga piniriso ug libre pa gayod sila sa pagkaon.

Maayo kining maong lakang. Alang nako, dako kaayo kinig ikatabang aron mapahimuslan sa mga binilanggo ang mga adlaw sa ilang pagsilbi sa ilang sentensiya. Sa ingon, dili mausik ang ilang panahon.

-o0o-

Daghan ang nahinugon sa pagkasunog sa Plaza Fair, usa sa labing dakong department store sa Colon area sa dakbayan sa Sugbo, diin gibanabanang mokabat sa P15 ngadto sa 20 milyones ang danyos sa sunog.

Anugon gayod kaayo nga nasunog ang maong department store tungod kay barato kaayo ang mga kan-anan sa sulod niadto ug alegre pa gayod kaayo tungod sa daghang kalingawan sa sulod.

Ang Plaza Fair usa sa nag-unang shopping center sa dakbayan sa Sugbo, partikular na sa Colon area. Daghan ang nahinugon pag-ayo nga nasunog ang maong establisamento tungod kay mao man kadto ang punsisokan sa daghang mangaonay tungod kay daghan man kaayong baratong pagkaon sa kinaibabwang andana niini.