Maghusay Ta! By Uriel Vallacera In Cebu Province

ARON MADALI ANG TRANSAKSIYON

BAG-O pa ganing nakalingkod sa katungdanan ang bag-ong kolektor sa aduwana sa Cebu City apan mihimo dayon siyag mga kausaban nga iyang gituohan nga makapalambo sa dakbayan sa Sugbo, partikular na sa pamatigayon diin dakog kalabotan ang operasyon sa pantalan.

Tugotan na sa bag-ong collector sa Bureau of Customs sa Cebu nga si Ricardo Belmonte ang mga importers nga direktang makapadunggo sa ilang mga kargamento sa pantalan sa Sugbo nga dili na kinahanglang moagi pa sa Manila.

Kini aron magamit dayon sa mga importers ang mga imported nga mga produkto alang sa ilang negosyo. Maghatag usab kinig kasayod sa mga negosyante sa pagpahigayon sa ilang negosyo dinhi sa Sugbo.

Gipasabot ni Collector Belmonte nga unang nihangyo kaniya ang Colombia Motors nga makadiretso na sa ilang mga kargamento sa Sugbo aron mas madali ang transaksiyon.

Para nako, maayo kining ideya ni Belmonte tungod kay wala na may daghang kuti-kuti. Tungod niini, mas maikag ang mga negosyante sa pagpasulod sa ilang mga produkto sa Sugbo kay dili man lisod ang proseso. Kon duna lay hustong pagbantay, dili man gihapon makalusot niini kadtong mga palusot nga illegal.

-o0o-

Sa Kabisay-an ug Mindanao, sikat kaayo karon ang pulong nga "jerjer" nga gisabot sa kadaghanan nga pakighilawas. Pero ang nagpasikat niining maong kolokyal nga pulong nag-ingon nga nagpasabot nini og "kaligo".

Gihisgotan ko kini tungod kay mao man god kini ang nahimong ugat sa kontrobersiya nga gikalambigitan karon ni Joash Dignos, broadcaster sa DYHP RMN Cebu nga gipasakaan og kaso sa usa ka dakong opisyal sa usa sa mga siyudad sa Cebu gumikan sa pamasangil niini sa kahanginan nga ang maong opisyal mi-"jerjer" sa iyang umagad.

Tukionon kaayo kon unsa gyod ang buot ipasabot sa pulong "jerjer". Pero daghan gyod ang midawat ug misamot sa maong pulong isip sexual intercourse. Bisan asa karon sa Kabisay-an, ang pulong "jerjer" gisabot sa kadaghanan nga "pakighilawas".
Apan ambot kon unsay impresyon sa korte mahitungod niini.

Mao nga atangan na lang nato ang gipasakang kaso batok ni Dignos. Kay kon ang korte modawat sa pulong "jerjer" isip pakighilawas, posibleng maisip gayod nga malisyoso ang gibuhat ni Dignos sa kahanginan batok sa usa ka prominenteng pamilya.