MAGHUSAY TA! By Uriel Cruz Vallecera

KARAAN NGA SISTEMA

ANG tartanilya usa sa labing karaan nga sistema sa transportasyon sa Cebu City nga napreserbar hangtod karon. Bisan sa kamoderno na sa panahon karon, may mga dapit pa gihapon sa Sugbo nga ang tartanilya maoy nagserbisyo sa mga pasahero.

Ang tartanilya maisip na nga usa ka karaang kultura sa transportasyon sa Cebu. Sa pagkakaron, makita nato nga magbiyahean kining maong matang sa salakyanan sa Duljo ug Pasil sa dakbayan sa Sugbo.

Dalaygon kaayo ang lakang sa pagpahigayon og tinuig nga Tartanilla Festival matag Hunyo aron pagpreserbar sa maong kultura. Pinaagi sa festival, seguradong madasig ang mga Sugboanon sa pagpreserbar sa kultura sa tartanilya.

Gawas niini, segurado usab nga makakabig og mga turista ang pagpahigayon og Tartanilla Festival. Angay nga hatagan og dakong pagtagad kining maong kalihokan aron nga gawas sa Sinulog Festival, ang Tartanilla Festival mahimong laing dakong kalihokan sa dakbayan sa Sugbo matag tuig.

Sa ingon nga paagi, dili gayod mohigos ang gidaghanon sa mga turista nga moduaw sa Sugbo sa tibuok tuig. Kon duna may Sinulog Foundation, angay usab nga adunay Tartanilla Foundation.

-o0o-

Ang gikataho nga may mga terorista nga mikabat sa 80 ka buok nga nakasulod sa Sugbo gidoblahan usab sa pagbuto sa balita nga may mga sparrow units usab ang New People's Army nga adunay training mission sa Sugbo.

Kon maoy atong tuohan ang taho, maoy gitumong nga hiposon sa nahisgotang mga sparrow unit ang mga kurakot nga opisyal sa gobyerno. Pero ambot kon may lig-on bang basehanan kining maong balita o may maniobra nga nagpaluyo niining tanan.

Kon atong hinumdoman, hangtod karon aktibo pa kaayong naglihok ang mga vigilantes sa Sugbo nga sa pagsulat niini, mikabat na sa 165 ang gitumba. Kon tinuod nga may 80 ka terorista nga nakasulod sa Sugbo, dugangan pa sa giingong mga sparrow unit, pastilan, kakuyaw na diay sa Sugbo, no?

Pero sa dili pa kita mag-panic, maayong atong tun-an ug maayo ug analisahon kon may sukaranan ba ang maong mga pangangkon. Ug labing maayo nga magbantay kita kanunay aron dili kita malutsan ni bisan kinsang daotang tawo.

-o0o-

Hingpit nga gipahimangnoan ang mga lumulupyo sa kabarangayan sa Mandaue City sa pagpanglimpiyo sa palibot aron kalikayan ang balatian sama sa dengue nga usa ka matang sa sakit nga makamatay.

Si Mandaue City Health Officer Dr. Oscar Quirante miingon nga ang kakulang sa kalimpiyo sa palibot maoy usa sa nag-unang hinungdan sa pagdagsang sa mga lamok nga maoy nagdala sa sakit nga dengue.

Mao nga pinaagi niining ubos kong lindog, akong dasonan ang pahimangno sa kagamhanan sa Mandaue pinaagi sa pagdasig sa atong kaigsuonan sa pagpanglimpiyo sa ilang palibot aron pagseguro nga dili mabuhi ang mga lamok.

Karon nga ting-ulan na, gipaabot nga mosaka ang kaso sa dengue. Apan kining maong sakit posibleng malikayan pinaagi sa pagmintinar sa kalimpiyo sa palibot. Mao nga dili kita magtinapolan sa pagpanglimpiyo tungod kay alang ra man usab kini sa atong kaayohan.

-o0o-

Dunay naghatag kanakog kasayoran nga diha sa Colon area, naay tawo diha, ambot kon tinuod ba siyang polis o nagpa-polis-polis lang, nga mosakay sa mga taxi ug mangayog P150 sa driver.

Manghulga kuno ang maong tawo ug magdala usab og citation. Pero nahibulong sila kay kon makadungog gani nga may magsingabot nga mobile nga mag-siren, motago man dayon ang maong tawo.

Polis kaha gyod kining tawhana? O nagpa-polis-polis lang aron makapangilkil sa mga taxi driver nga iyang dakpon bisan walay nahimong violation? Naa ba goy mananakop nga mosakay sa taxi nga iyang dakpon?

Maayo tingali nga masusi kini sa kapolisan aron pagsuta kon unsa ka tinuod kining sumbong nga akong nadawat. Dili maayong pasagdan kon tinuod man ugaling kini. (Columnist Uriel Vallecera is based in Cebu province)