Zambo Sur Medical Center, andam na mopahimutang sa mga pasyente nga mopailawom sa surgical operation

PAGADIAN CITY - Andam na ang mga kawani sa Zamboanga del Sur Medical Center, dao ning dakbayan nga mopahimutang sa mga pasyente nga ipailawom sa libre nga surgical operation sa mga espesyalistang doktor gikan sa kauluhan.

Kini maoy tipik sa giluwatang pamahayag ni Dr Atilano Jesus A. Ocampos, Provincial Health Officer ug hepe sa nasangpit nga balay-tambalanan atol sa gihimo nga interview sa Philippine Information Agency.

Matud pa ni Dr Ocampos nga gi-andam na nila ang walo ka mga kuwarto nga kapahigayon sa surgical operation sa mga pasyente nga human nakapailawom sa pre-screening nga gihimo duha ka semana ang nakalabay.

Himoon ang color coding aron mahatagan ug kasayon ang mga pasyente nga mopailawom sa nasangpit nga surgical operation diin ang matag-gidestino nga kuwarto adunay naghinungod nga numero aron sayon matultulan sa mga pasyente ang kuwarto nga gidestino nganha kanila.

Ang libre nga medical ug surgical outreach mission nga gipasiugdahan sa kagamhanang ning lalawigan pinaagi ni Gobernador Aurora Cerilles, giabagan sa Renal Disease Control Program -National Kidney and Transplant Institute (REDCOP-NKTI), Department of Health-Center for Health and Development, Zamboanga Peninsula (DOH-CHDZP), ug Philippine Information Agency, gitakdang ipahigayon karong Pebrero 27-28 sa Zamboanga del Sur Medical Center diin ang gipunting nga mga benepesyaryo nga makapimulos sa nasangpit nga programa mao ang mga kabus ug timawa nga mga mulupyo sa mga kalungsuran sa Zamboanga del Sur.

Gipahayag ni Dr Ocampos nga sugdan na karong adlawa (Miyerkoles), pagpasulod sa mga pasyente nga nahumana nakapailawom sa pre-screening aron nga mapasayon ug mapahimutang pag-ayo ang ilang pagpailawom sa nasangpit nga operasyon.

Ang mga espesyalistang doktor gikan sa kaluluhan nga mahidangat dinhi sa dakbayan, panguluhan sa lumad ug tubo sa Pagadian nga si Dr Enrique Ona, Executive Director sa NKTI, Dr Remedios de Belen-Uriarte, National Program Manager sa REDCOP, nephrologists ug urologists nga mopaambit sa ilang medical expertise kabahin sa sakit nga kidney, pagpahibalo sa mga preventive measures, ug uban pang mga susamang isyu nga may kalabutan ang maayong panglawas kini sa ipahigayon nga Lay Forum on Renal Disease Prevention and Organ Donation nga pagahimoon sa Pebrero 27, 1-5 ang takna sa hapon sa Amusement and Event Center (AEC), Provincial Capitol Compound ning dakbayan.

Ang Lay Forum gitakdang pagatambongan sa mga Municipal Health Officers, Sangguniang Bayan officials nga chairman sa Committee on Health, empleyado sa kagamhanan, mga magtutudlo, estudyante, ug uban pa, gikan sa mga kalungssuran sa Zamboanga del Sur ug dakbayan sa Pagadian.