Friday, July 24, 2009

Sobra sa P10 milyones nga bili sa sakyanan sa kagamhanang lokal, gisubhan


PAGADIAN CITY - Gisubhan ning nakalabay nga Hulyo ang 19 ka mga sakyanan nga gipanag-iyahan sa kagamhanang lokal ning dakbayan sa City Hall Complex.

Ang inaugural ceremony gidumala ni San Jose Parish Priest Rev. Father Carding Pintac, ug gitambongan nila ni City Mayor Samuel Co, City Officials, Department Heads, ug mga kawani.

Ang 19 nga surplus nga mga sakyanan mao ang ikaduha nga batch sa mga gpalit nga sakyanan sa dakbayan nga gilangkuban sa dagko nga bus, CD cab, ug mga motorsiklo.

Naglakip niini ang tourist bus, 4x4 nga service vehicle, 6x6 military type vehicle, usa ka ambulansya nga gihatag ni Presidente Gloria Macapagal-Arroyo pinaagi sa PCSO, mga motorsiklo nga magit sa Barangay Affairs Office (BAO), ug uban pa. Ang una nga hugna nga naaangkon nga mga sakyanan mao ang 17 ka buok 4x4 nga sakyanan sa mga City Councilors ug mga department heads.

Gilakip na nga gisubhan mao ang 5 ka sets sa mechanical dryer nga gihatag sa Department of Agriculture.

Matud pa ni Co nga tuyo nga gipalit sa kagmahanan ning dakbayan ang mga nasangpit nga sakyanan aron hingpit nga maalagaran ang mga katawhan ilabi na ang anaa sa kabukiran. "Ang pagkaangkon ning mga sakyanan, usa ka paagi nga makita sa katawhan kon asa padulong ang ilang buhis ug asa an g nadapatan niini," dugang pahayag ni Co.

Si Federation of Farmers Association President Arsenio Carillo nalipay ug dako tungod kay usa sa mga napalit nga sakyanan mao ang 6x6 military type nga magamit sa mga mag-uuma.

"Dili matukib ang ang among kalipay nga gibati tungod kay sa hingpit aduna nay sakyanan nga among magamit nga mga mag-uuma sulod sa pipila ka mga dekada ang nakalabay," pahayag ni Carillo.

"Dako ang among pagpasalamat ni Mayor Co tungod kay iyang natubag ang mga pagpanginhanglan kanamong mga mag-uuma nga among gipangandoy sa dugay na nga panahon," dugang pahayag ni Carillo.

Pinaagi sa mga nasangpit nga sakyanan, masilbihan usab ang mga kawani sa rehiyonal nga mga buhatan nga nagpuyo sa dakbayan sa Zamboanga tungod sa pagkaangkon sa tourist bus nga mohatud kanila sa matag-adlaw nga Biyernes sa nasangpit nga dakbayan.

No comments: