MAGHUSAY TA! By Uriel Cruz Vallecera In Cebu

ANG SUGBOANONG BAYANING PILIPINHON

ANG Gawad Geny Lopez mopili ug mohagpat niadtong mga personahe nga nakahimo og talagsaong buhat sa katilingban nga ilang gipuy-an aron sila pasidunggan isip mga buhi nga bayaning Pilipinhon.

Karong tuiga, usa ka Sugboanon ang palaran nga napiling usa sa mga nominado sa pagka Bayaning Pilipino sa Teacher's Category. Siya mao si Mrs. Fe Tejano Tabaco. Usa ka magtutudlo ang iyang propesyon ug hangtod sa iyang pagretiro matinud-anon niyang gituman ang iyang kaakohan isip usa ka magtutudlo.

Matod pa ni Mrs. Tabaco, wala niya damha nga usa siya sa mapiling finalist sa pagka Bayaning Pilipino sa Teacher's Category nga maoy nagrepresentar sa Central Visayas alang sa prestihiyosong Gawad Geny Lopez.

Ang nag-endorso sa ngalan ni Mrs. Tabaco mao si Mrs. Guadalupe Baring nga usa pod ka nominado sa Gawad Geny Lopez niadtong tuig 2003. Patakaran na sa Gawad Geny Lopez nga ang usa ka nominado entitled sa pag-endorso og ngalan alang sa lain na usab nga hugna sa pagpili og hubing mga bayani sa atong nasod.

Suwerte nga si Mrs. Tabaco maoy napilian ni Mrs. Baring. Ug ang nominasyon ni Mrs. Baring kaniya wala makawang tungod kay siya man ang nahimong finalist sa rehiyonal nga kategoriya hinungdan nga siya ang napadala ngadto sa Manila alang sa nasyonal nga hagpatay.

Tulo lamang silang mga nominado sa teacher's category nga nahimong finalist alang sa nasyonal nga hagpatay. Gawas kang Mrs. Tabaco nga lumad nga taga Talamban, Cebu City, ang lain pang duha ka finalist mao sila si Ma. Magdalena Geronimo sa Cavite City ug Juanita S. Arguel sa Limay, Bataan.

Si Gng. Arguel mao gayod ang nakadaog isip Bayaning Pilipino sa teacher's category. Apan alang kang Gng. Tabaco, kontento na siya sa iyang naabot. Ang iyang pagkapili nga finalist giisip na niyang usa ka kadaogan busa wala siya magmahay nga wala siya makadaog sa nasodnong hagpatay. Labaw nang wala usab siya mahisagmuyo.

Si Mrs. Tabaco nag-alagad isip usa ka magtutudlo sulod sa 38 ka tuig. Natawo siya niadtong Hunyo 16, 1946 ug miretiro sa serbisyo niadtong Hulyo, 2006. Usa siya sa labing respetadong magtutudlo sa Talamban Elementary School diin siya nagtudlo hangtod sa iyang pagretiro.

Dili lalim ang mga pagsulay nga gisungasong ni Mrs. Tabaco sa wala pa niya makab-ot ang kalamposan ug kadaogan. Nag-self support siya sa pag-eskuyla sa tinguha nga makahuman og kurso. Sayo man god siyang nailo sa iyang mga ginikanan.

Nakatapos siya sa elementarya sa Talamban Elementary School. Gitapos niya ang segundarya sa Colegio de San Jose Recoletos (karon USJ-R). Mitungha siya sa kolehiyo sa Cebu Normal College diin natapos niya ang silid sa usa ka magtutudlo.
Gibutyag ni Mrs. Tabaco ning tagsulat nga ang iyang kinabuhi puno sa mga hagit.

Nagtuo siya nga ang kinabuhi dinhi sa kalibotan usa ka hagit ug gikaluhaan og misyon mao nga gipaningkamotan niya ang paghimo sa tanan nga iyang gituohan nga angay niyang buhaton.

Ang iyang nominasyon isip Bayaning Pilipino sa teacher's category giisip niyang pabawon sa iyang pagretiro sa serbisyo. Kuti kaayo ang pagpili sa buhing bayani ug gihulagway niya nga wala gayoy sambog nga bulok sa pamolitika ang proseso sa pagpili.

Mao nga alang kang Mrs. Tabaco, gibati niya nga takos siya sa maong nominasyon tungod kay dili man iyang kabubut-on ang pagtuboy sa iyang kaugalingon alang sa maong pasidungog. Nagtuo siya nga ang maong pasidungog maoy bugti sa iyang mga pagsakripisyo.
Ang kamatinud-anon ni Mrs. Tabaco sa pagpangalagad daan nang nakita sa iyang mga higala, kabanay, mga ginikanan ug sa mga kauban niyang mga magtutudlo. Gani siya man ang gipasidunggan isip model teacher niadtong tuig 1997.

Unya sa tuig 2006, nakuha niya ang nominasyon sa pagka bayaning Pilipinhon. Ang gikuhaan og kredito sa pagpili kaniya mao ang daghang dalaygong buhat nga iyang nahimo diin takos siyang himoong modelo. Mao nga alang kanimo, Ma'am, mosaludo ako. Hinaot nga magdaghan ang imong kaliwat.