MAGHUSAY TA! By Uriel Cruz Vallecera In Cebu

LIBRO BAHIN NI DAVIDE

SA akong pagsulat niini, gikataho nga migawas na gikan sa patikanan ang libro nga nag-ulohan og "Davide: An Unauthorized Biography" nga gisulat ni Dean Antonio Tupaz.

Ang maong libro naghisgot mahitungod ni kanhi Supreme Court Chief Justice Hilario Davide, Jr. Gituki dinhi sa maong basahon ang iyang kaligdong ug ang kalig-on sa iyang baroganan.

Sa katibuk-an, ang maong libro naghisgot sa kinabuhi ug career ni Davide, lakip na sa yano niyang kagikan sa Colawin, Argao, Cebu. Sa maong basahon atong masayran ang yano niyang sinugdanan nga maoy gihimo niyang gabayan sa dako niyang kalamposan.

Sumala pa sa nakabasa na sa maong libro, maayo kining pagkasulat ni dean Tupaz. Dasok sa mga kasayoran ug kakuhaan og leksiyon, ilabi na niadtong mga tawo nga gustong magbaton og malinis nga rekord sa binuhatan sama ni Davide.

Si Davide garbo sa Sugbo. Dili lang ang mga Sugboanon maoy nagtinguha nga mopapili siya pagka presidente sa Pilipinas kondili lakip na ang ang katawhan sa ubang dapit sa Pilipinas nga miidolo kaniya. Pero si Davide miudlingay na sa politika.

Sulayig bisita ang suki ninyong mga bookstores kon gusto kamong makabaton og kopya sa libro bahin ni Davide.

-o0o-

Gikabalak-an gayod og maayo kon mataapos ba sumala sa gitakda nga petsa sa paghuman sa katukoran sa Cebu International Convention
Center (CICC) sa Mandaue City nga gamiton sa ASEAN Summit.

Dili kalikayan ang kabalaka sa kadaghanan tungod kay hangtod karon ugod, mga haligi pa man ang napabarog. Pero mosalig lang kita sa taktika sa atong mga opisyal sa lalawigan sa Cebu nga optimistiko kaayong mahuman gayod ang maong proyekto segun sa gitakda niining panahon sa paghuman.

Nanghinaot ko sa tumang kamainiton nga mahuman gayod kini tungod kay kon matigayon gayod ang katukoran sa maong proyekto, magsilbi kining laing trademark sa lalawigan sa Cebu nga makatabang sa pagdapit sa mga turista ug ingon man sa mga negosyante.