Guimaras Oil Spill Victims, Babayaran Na Rin Sa Wakas

CEBU (Mindanao Examiner / 03 Apr) – Makukuha na rin sa wakas ng lahat ng mga naapektuhang mangingisda at residente ng oil spill crisis sa Guimaras ang kompensasyon nito pagkatapos ng Semana Santa.

Nabatid ito ngayon kay Carlos Tan, manager ng Petron Health, Safety and Environment, na aniya'y tinatayang 12,000 fishermen, residente at resort owners ang makakatanggap ng kabayaran mula P630 hanggang P28,000 bawat isa, depende sa bigat ng naging perwisyo sa kanila.

Ang halaga ng kompensasyon ay base sa tatlong buwang nawalan ng oportunidad o kinita ang mga napinsalang residente.

Umaabot sa $330 milyon ang inaprubahang pondo ng International Oil Pollution Compensation (IOPC) para sa kabuuang rehabilitasyon ng oil spill buhat sa lumubog na MT Solar 1.

Tinatayang P110 milyon pa lamang ang paunang naibahahagi sa mga biktima ng oil spill sa Guimaras at ang iba ay nakabitin dahil na rin sa problema sa kuwalipikasyon ng mga ito upang tumanggap.

Samantala, tuluyan na ring natapos ang paghihigop ng 9,000 litro ng nalalabing langis sa karagatan ng Guimaras at Iloilo.

Isusunod na ang huling bahagi ng clean up operations upang tuluyang makabawi ang mga napinsala. (With a report from Juley Reyes)

Langis Mula Solar 1 Tanker, Masisimot Na!

MANILA (Mindanao Examiner / 31 Mar) – Makukumpleto na rin sa wakas ang ang paghigop ng mga nalalabing langis na tumagas buhat sa Solar I tanker sa Guimaras island sa loob ng susunod na Linggo.

Ito ang kinumpirma sa Mindanao Examiner ni Office of Civil Defense administrator retired General Glen Rabonza. Una nang pinasimulan noong Enero ang oil recovery operations dahil na rin sa inaasahang magandang panahon para mabilis na maisakatuparan ito.

Ayon kay Rabonza, kasunod ng paglinis ng mga langis, pasisimulan naman ang rehabilitasyon ng mga apektadong lugar sa isla.

Sa mga nakalipas na araw, kaunting langis na lamang ang nakukuha ng Allied Shield ng Italya na nangangahulugan na malapit na ring tuluyang maubos ang oil spill.

Gumastos na rin ng multi-milyong piso ang International Oil Pollution Compensation Funds (IOPC) para sa siphoning ng oil spill sa naturang lalawigan. (Juley Reyes)